Lina Sandell står som ein av Sverige sin høgast skatta salmediktar, og har skrive nokre av våre mest kjente og kjære salmar som ”Blott en dag”, ”Bred dina vida vingar” og ”Tryggare kan ingen vara”. På konserten, som har fått nettopp tittelen ”Blott en dag”, vil koret syngja 14 utvalde songar, under leiing av sin dirigent Ingunn Bjorland. Den kjende komponisten Sigvald Tveit har arrangert songane for koret, og programmet vil verta bunde saman av historikk om Lina Sandell. Det er Brit K. Holgersen som har sett saman desse tekstane og blir framført av Marianne Røise Lygren.

Carolina (Lina) Vilhelmina Sandell, var fødd 3.oktober 1832 i Småland i Sverige, og døydde 1903. Ho var diktar, teolog, forfattar og salmeforfatter, og skreiv over 1700 dikt. I tillegg til denne tekstformidlinga, er Marianne Røise Lygren og Håkon Bjorland Hansen inviterte til å vera solistar ved fleire av songane. Og Ingvar Lygren vil akkompagnere på piano.

Og det gildaste av alt, seier ein engasjert dirigent, er at folk får vera med å syngja på nokre av songane! Ved dei tidlegare framføringane i fjor vår og tidleg haust, vart då også dette salmeprogrammet svært godt motteke. Det var både godt frammøte, glede over å få delta, og ikkje minst vart det gitt ros for høg kvalitet på innhald og framføring. ”Koret let heilt profesjonelt”, ”Ikkje ein urein tone” og ”Dette er den gildaste konserten eg har vore på”, var nokre av kritikkane og tilbakemeldingane koret fekk.

Jæren kammerkor, under leiing av sin særdeles dyktige og inspirerande dirigent Ingunn Bjorland, er no inne i sitt femtande år. Føremålet til koret er å arbeide med god og relevant kyrkjemusikk og å rekruttere medlemer frå heile Jæren. Øvingsstad er Nærbø kyrkje. Har nokon lyst å bli med, er dei hjarteleg velkomne.

I jubileumsåret kjem koret til å arbeida med eit heilt nytt og flott konsertporgram med songar av vår eigen forfattar Trygve Bjerkreim, og med den kjende svenske songaren Lage Wedin som solist. Det er nok, skulle vi tru, berre å nemna songen ”Det er makt i de foldede hender”. Denne konserten vil bli framført seks stader i Rogaland rundt andre helga i juni.

Kor og dirigent har elles eit fast engasjement i helseprosjektet Braincare Ethiopia. Braincare Ethiopia er ei idealistisk stifting, finansiert frå private gåver, og har som føremål å bygge opp nevrokirurgisk kompetanse – og behandlingstilbod i Etiopia. For dei som måtte ønskja det, blir det høve til å gi ei gåve til dette prosjektet ved utgangen etter konsertane.

Skrive av Åge Mundal